Dag Jørund Lønning byrjar i stillinga 1. september i år. Han tek over etter professor Reidar Almås, som bygde opp dette senteret.

Høgt nivå
– I år kan Norsk senter for bygdeforsking feira 25-årsjubileum. Eg trur ikkje eg er så langt frå sanninga når eg meiner at dette er det største bygdeforskingssenteret i verda, med eit internasjonalt forskingsmiljø på høgt nivå. Senteret publiserer mykje på ei rekkje område, seier Lønning.
Senteret ligg i Trondheim med tilknyting til universitetet der. Lønning og familien må difor flytta til Trøndelag. Der vil han skaffa seg eit gardsbruk dei kan bu på og driva. Sidan 2000 har han vore fagleg leiar av Senter for natur- og kulturbasert nyskaping ved Telemarksforsking i Bø.

Spela på kvalitetane
– Dette vert ei fabelaktig utfordring og eit framifrå høve for meg til å gjera noko innanfor bygdeforsking. Eg er oppteken av at forskinga skal brukast til noko nyttig og konkret. Ikkje berre fine ord og planar. For meg er det viktig å finna positive løysingar. Problem og svartmåling er lite konstruktivt i arbeidet med å få til utvikling i bygdesamfunna. Ein må prøva å koma vidare og få fram dei spesielle kvalitetane landsbygda har, seier Lønning.

Profil som passar godt
Styreleiar Tore Bjørkli i Bygdeforsking er godt nøgd med at Lønning er den nye direktøren.
– Lønning er ein handlekraftig person med eit stort hjarta for bygda. Han ser moglegheiter og er oppteken av nytenking og innovasjon. Høg forskingskvalitet og tett brukarkontakt står sentralt ved Bygdeforsking. Lønning sin bakgrunn og omgjengelege profil passar godt inn i denne strategien, seier Bjørkli, og legg til at dette lovar godt for Bygdeforsking si framtid.
Styreleiaren nemner elles at den nye direktøren har ein variert og brei bakgrunn frå nyskaping og bygdeutvikling, og han har leiarerfaring frå regionale og internasjonale utviklingsprosjekt.

Rik og brei erfaring
Lønning er sosialantropolog. Hans viktigaste forskingsfelt ved Telemarksforsking har vore nyskaping og bygdeutvikling. Dessutan har han erfaring frå midtaustenforsking ved Christian Michelsens Institutt i Bergen, og han har arbeidd med aksjonsretta rekruttering til landbruket hos fylkesmannen i Hordaland.
Internasjonale utviklingsprosjekt har han òg teke del i, m.a. som prosjektleiar i "Farmers for Nature". I tillegg har han vore engasjert i ei rekkje regionale utviklingsprosjekt i Telemarksområdet. Lønning har òg hatt stor fagleg produksjon, som til dømes har resultert i bøkene "Gøy på landet" "Landbruk i ei postmoderne tid", "Bønder i soloppgang" og "Den norske bygda og Den Store Verda. Om lokal utvikling i ei global tid".