Også Stord Næringsråd treng meir tid til å ta stilling til kommunedelplanen. John Førland, dagleg leiar i næringsrådet, seier at dei valde nytt styre i juni, så kom sommarferien, og dei synest ikkje dei har fått god nok tid til å vurdera kommunedelplanen. Næringsrådet sende difor brev til forvaltingsstyret i forkant av deira møte 23. august med ynskje om utvida høyringsfrist.

Næringsutvikling i Leirvik sentrum er svært viktig for Stord og me vil svært gjerne få høve til å gjera ei grundig vurdering av høyringsutkastet og koma med merknader, skriv Stord Næringsråd i brevet til forvaltingsstyret.

Også Stord RV sin toppkandidat ved kommunevalet, Mohamed Kallel, er av same meining:

- Ei så viktig sak bør ein venta med til etter valet, så innbyggjarane får ha eit ord med i laget. Stortinget har ein udemokratisk tradisjon med å vedta viktige saker rett før valet, la ikkje kommunen vår innføra den same tradisjonen, seier Mohamed Kallel.

- Sjølv om saka er ferdig utgreidd og handsama av administrasjonen og alle høyringsinstansar, vil det vera udemokratisk å vedta saka før valet, særleg når saka truleg er svært viktig for mange sitt val av parti i år, legg han til.