Sunnhordland

Dei 164 frammøtte fekk høyra verk av Edvard Grieg og kinesisk tradisjonsmusikk. Det blei to vakre timar med klangfullt samspel av Det Kinesiske Nasjonale Orkesteret og dei norske solistane sopran Bodil Arnesen, fløytist Steinar Ofsdal og fiolinist Catharina Chen. Konserten hadde fått tittelen "Grieg i kinesisk klangdrakt"
Dei 40 kinesarane i orkesteret starta konserten med Edvard Griegs "Peer Gynt Suite". Eit "unorsk" og meir leikent klangbilete blei skapt. Det skulle berre mangla, sidan kinesarane har særs interessante instrument, som til dømes dei kinesiske bogeinstrumenta.
Solveigs song
Den norske sopranen Bodil Arnesen var det einaste "heilnorske" innslaget i framsyninga. Ho song så truskuldig trufast og ekte som Solveig til Peer Gynt. Hennar lyriske sopran passa godt til Grieg si musikk. Samspelet mellom kinesarane og Arnesen fungerte også godt.
I komposisjonane "Draug" og "Gang" blei det skapt eit fyrverkerisampel mellom fløytist og komponist, Steinar Ofsdal og ensemblet. Det var imponerande å sjå Ofsdal i sving både som dirigent og spelar. Eg tykkjer komposisjonane blei tilført noko ekstra med kinesiske trommer, klimpreinstrument og tostrengs fiolinar.

Erhu Jin Yue og Zhao Cong spelte ein kinesisk samtidskomposisjon med tonegongar som kunne minna om både blues og bluegrass.

Kinas Romeo og Julie

Frå si aller beste side og med meir temperament og variasjonar viste orkesteret seg fram med sin kinesiske tradisjonelle musikk.
Særleg nemnast, og som ikkje blir så fort gløymt er komposisjonen "The Butterfly lovers" med den unge norske fiolinisten Catharina Chen. Ho spela så intenst vakkert og konsentrert at det nesten tok pusten av Stord-publikummet.
Kinesarane var tydeleg stolte av den kinesisk utgåva av "Romeo og Julie", som handlar om den mest populære kjærleikshistoria i Kina. Orkesteret og Chen spelte sjelfullt legenda om dei to elskarane, som levde på 400-talet, som ikkje kunne gifte seg fordi dei hadde ulik familiestatus. Etter sin død blei dei eit sommarfuglpar.

Latter frå salen
Orkesteret tar ikkje berre for seg kinesisk tradisjonell musikk gjennom utføring av tradisjonelle stykke, men dei tolkar og utfører musikk av kinesiske samtidskomponistar.
Laust sat latteren, då den kinesiske duoen Erhu Jin Yue og Zhao Cong tolka ein samtidsballade med variasjonar. Dei viste ei ekte speleglede der ho spela eit luttliknande instrument og han den klassiske tostrengs fiolinen.
Og publikum ville ha meir av den kinesiske folkemusikken. Klappinga vil ingen ende ta då konserten var slutt. Dirigenten tok utfordringa og det blei ikkje berre to ekstranumra, men tre.
Det Kinesiske Nasjonale Orkesteret, som blei grunnlagt i Beijing i 1960, er det største og viktigaste nasjonale musikkorkesteret i Kina. Dei vitjar no Noreg under den tre månaders Kinesiske Kulturfestivalen. I tillegg til Stord kulturhus, har dei gjeve konsertar i Oslo, Stavanger og Bergen.

Det nasjonale kinesiske orkesteret vitja Kulturhuset måndag kveld. Mellom solistane var sopranen Bodil Arnesen.

Sunnhordland.no on Facebook

Postadresse:
Boks 100, 5401 Stord

Hovudkontor:
Borggata 15, Stord

Ansvarleg redaktør:
Magne Kydland

Sunnhordland arbeider etter Redaktørplakaten, Ver Varsam-plakaten og Tekstreklameplakaten sine retningslinjer for god presseskikk.

Papirutgåva i dag

Siste blogg

Papirutgåva
i dag