Sist det var aktiv rockeklubb på Stord var Kjetil Barane, Torbjørn Lægreid, Hans Anti og Øystein Gjertsen for unge til å vera med. No realiserer dei draumen om å få liv i rockemiljøet att. Skjærtorsdag inntek Stord Rockeklubb utestaden Tapperiet for det som etter planen skal bli ei månadleg samling.
– Det blir sjølvsagt rock på høgtalarane, og musikkvideoar på skjermen. Etter kvart håpar me å få lokale band til å stilla opp på scena, seier Barane. Kameratane er sikre på at rocken framleis lever i beste velgåande blant Vestlendingar.

Rock i krisetider
– Rock er alltid aktuelt, kanskje spesielt i nedgangstider, meiner Barane. Gjengen, som har eigen buss til disposisjon, kjem til å arrangera konsertturar for medlemmene i klubben. Første turen blir til Haugesund med Ingenting og Bastard på plakaten, og i sommar skal bussen i retning Bergen og rockelegenda Bruce Springsteen.
– Klubben er open for heile regionen. Bussen svingar glatt innom Bømlo eller Fitjar før konsertar om me får med medlemmer der ifrå, seier Anti.

Frå Springsteen til heavy
Kameratane påpeiker at klubben er open for alle vaksne som er interesserte i rock. Om det er hard eller mjukare rock som får foten i gang, har ikkje noko å seia.
– Alle som er interesserte i rock kan vera med, anten dei likar Springsteen eller Black Metal, seier karane, og viser til rockeinteresse som einaste kriterium.
– Me er ein idealistisk klubb, men må sjølvsagt ha ein medlemspris for å dekkja utgiftene, seier Barane, som presiserer at all inntening går direkte til nye arrangement.