– Vårt kjære publikum har blitt oppfordra om å komma med ønske til Tysnesfest 2012. Aldri har me motteke slike mengder med tilbakemeldingar om eit særskilt band. Her var det ingen over og ingen ved sidan av. Me er glad for å kunna gleda alle som har ønska seg Kaizers Orchestra til Tysnesfest 11.-15. juli.
 
Me har brukt ordlyden Norges største liveband i mang ei lansering av band til festivalen, men no er det ei glede å endeleg ønska Norges største liveband velkommen til Gjerstad og Tysnes. Dette kjem til å bli deira einaste konsert i distriktet i løpet av sommaren 2012, heiter det i ei pressemelding frå festivalen med nærare 20.000 besøkjande.
 
Janove Ottesen, Geir Zahl, Terje Winterstø Røthing og resten av Kaizers Orchestra er midt inne i den særs ambisiøse triologien «Violeta, Violeta», og har travle tider for tida. Sist helg vart det ekstra travelt då gitarist Røthing kasta øl over Plumbo-vokalisten etter den mykje omtalte «mokkamann»-saka under Spellemannsprisen.
 
I ettertid har Røthing orsaka øl-skvettinga. Om det blir ølskvetting på Tysnes i juli er ikkje godt å seia, men det blir garantert pumpe-orgel, gassmasker, russisk rulett og oljefat, pluss hitar som «Ompa til du dør», «Ta kontroll på kontinentet», «Maestro», «Tusen dråper regn» med fleire.