Kampen mot Newcastle blir eit høgdepunkt i Brighton. Visat Sport har funne plass i sendeflata og reist til England for å intervjua stordabu Torbjørn Agdestein.
– Ein triveleg kar, seier fotballredaktør Mikal Harstad Groven i Viasat Sport.
 
Han landa i går på Gardermoen med ein fyldig reportasje om stordabuen i bagasjen.
– Ja, me hadde faktisk fleire timar saman. Ein artig og fornuftig kar, fastslår Harstad Groven.
 
I forkant av direkteoverføringa av denne fjerderundekampen vil kanalen visa eit kvarters innslag om nettopp Torbjørn Agdestein.
 
– Sjølve innslaget vert vel på åtte minuttar. For dei som ikkje måtte få dette med seg der og då, så har dei sjansen til å få det med seg ved å gå inn på facebook-sida vår. Der vert innslaget lagt inn tidleg i neste veke. Det me elles gjorde var å få Agdestein til å signera ein Brighton-drakt. Denne vil gå som premie på ein konkurranse som me legg opp til på facebook-sida, seier Harstad Groven.
 
Innslaget på Viast Sport vert sendt klokka 18.00 laurdag. Kampen som også vert overført direkte, startar 18.15.
 
Etter opphaldet i Brighton fekk fotballredaktøren eit bestemt inntrykk av at Agdestein ville vera i Brighton sin kamptropp.
– Mest sannsynleg startar han på benken, men etter dei flotte innhoppa han har gjort i dei to føregåande FA-cupkampane, så reknar eg nesten med at han får eit innhopp også i denne kampen, sluttar Mikal Harstad Groven.