Får ny sjanse frå retten
Stordabuen sa i retten at han valde å ikkje innretta seg etter lova. Likevel slapp han fengsel for ulovleg køyring.
Ein stordabu i 20-åra møtte i januar i Sunnhordland tingrett.
Han var sikta for å ha køyrt motorsykkel utan gyldig førarkort, og utan at motorsykkelen hadde lovleg forsikring. Stordabuen vart stoppa i ein kontroll i Sagvåg i fjor sommar.
Mannen har erkjent køyring, men gav i retten uttrykk for at han ikkje ynskjer å retta seg etter lova. Han er tidlegare straffa for liknande lovbrot.
Retten og dommarfullmektig Ronny Sødahl Furunes var i tvil om stordabuen denne gongen skulle sleppa fengselsstraff. Både fordi han har gjort slike ting tidlegare, og at han ikkje syner respekt for lovar og reglar. Dei enda til slutt på 18 dagars fengsel, på vilkår.
«Under tvil har retten komme til at denne straffa skal gjerast til fengsel på vilkår i to år, og retten gjev dermed sikta ein siste sjanse til å visa ei annan og meir lovlydig åtferd for slik å unngå å måtte sona fengselsstraff», heiter det i dommen.
