Musikantar frå Sagvåg, Tysnes og Rosendal skal delta i NM i brass i helga.
– Dette blir arrangert kvart år i Grieghallen i Bergen den andre helga i februar, seier leiar Heine Kaldefoss i Sagvåg musikklag.

Kjempar om plassering
Kaldefoss fortel at ambisjonen er å gjera det litt betre enn tidlegare år. I fjor kom Sagvåg musikklag på 8. plass i andre divisjon.
– Me håpar å komma litt høgare enn tidlegare. Korpset har dei siste åra plassert seg mellom 6. og 10. plass i andre divisjon, seier Kaldefoss.
Det er om lag 13-14 korps i kvar divisjon, og dei to beste korpsa i pulja rykkjer opp til ein høgare divisjon. Dei to dårlegaste rykkjer ned.

Hjelper kvarandre
– Det skal vera 28 musikantar i eit brasskorps for å fylla alle stemmene. Av den grunn skal eg også spela med korpset i Tysnes, seier Kaldefoss.
Han fortel at korpsa frå Sunnhordland har tradisjon for å hjelpa kvarandre, dersom det er mangel på stemmer.
– Sagvåg musikklag skal spela fredag og laurdag, så korpset reiser til Bergen fredag morgon, seier leiaren.