Hans Johansen står for kontinuitet både i innandørsturneringa i Fitjar og kvinnefotballen i Sagvåg. Sidan starten i Kultur- og idrettsbygget i Fitjar i 2001, har fotballveteranen stilt med eit godt trent og godt førebudd lag i kvinneklassen. Resultata har absolutt ikkje uteblitt.

– Eg har ikkje det nøyaktige talet, men at me har vunne klassen fem- seks gonger er i alle høve sikkert, slår den alltid topp engasjerte trenaren fast.

– Me har trent bra og mannskapet er stort sett det same. Dette skal me dra i land, smiler fotballveteranen.

Turneringsleiar Ole Bergesen kan i år fryda seg over ein fin oppgang i deltakartalet.

– Rett nok kjem me ikkje opp mot rekorden som vart sett opningsåret. Då kom det lag nær sagt frå kvar ein krok i Fitjar. Då enda me opp med 55 lag som framleis er rekorddeltaking. Dei siste åra har talet stabilisert seg på frå 30 til 34 lag. Difor er det eit positivt signal for oss arran-gørar når me i år får med 37 lag. Bedriftsklassen med sine seksten lag er største klassen. Kvinneklassen til tolv lag, medan ni lag kjempar i eliteklassen på herresida. Me får ei travel helg, seier Bergesen.

Alt i kveld går dei første kampane. Deretter rullar fotballen i hallen fram til 02.00 natt til laurdag. I denne perioden er det for det meste lokale lag i aksjon. Tidleg laurdag morgon er det på an igjen. Ved dagsrevytid laur-dag kveld reknar Bergesen med at finalane er unnagjort og at moroa er over for i år.