Samarbeidsrådet for Sunnhordland avsluttar veka i Oslo for å ha møte med ulike departement og organisasjonar som er relevante i forhold til å fremja dei sakene som Samarbeidsrådet har fokus på no.

Det heile starta i går ettermiddag med møte med Fiskerinæringens Havbrukslag (FHL) som skal presentera konsekvensanalysen for innføring av Hardangerfjordforskrifta. Analysen vert lagt fram denne veka.

I dag vert det møte med Samferdselsdepartementet og Kommunal- og regional-departementet.

– Dei viktigaste sakene her er å få E 39 Aksdal-Bergen inn i NTP og prioriteringar på E 134. I kommunal og regionaldepartementet er tema forenkla planprosessar, stat og kommunemeldinga og strandsonearbeidet i Sunnhordland. Det vert òg eit møte i KS, der tema blant anna er konsultasjonsordninga, forklarar dagleg leiar Gro Jensen Gjerde i Samarbeidsrådet.

Vidare denne dagen skal Samarbeidsrådet vitja Drammen kommune for å få ei orientering om kommunen si rolle i utvikling av byen, strategiske grep og omdømmebygging.

Fredag vert det først møte i Fiskeri og kystdepartementet, der tema er fiskerihamn i Austevoll og konsekvensanalyse for innføring av Hardangerfjordforskrifta. Fredagen vert avslutta med møte med Justisminister Grete Faremo, der tema er framtidige politidistrikt, bemanning og fengsel i regionen.