Dei fire fiskarane vil bli meldt til politiet etter den noko uvanlege fisketuren laurdag formiddag. Politiet fekk melding om hendinga klokka 11.25 laurdag. Og det hjelper truleg lite å nekte. Kystvakta har nemleg festa det ulovlege fisket på foto og film.

Fekk det travelt

Oppdrettsanlegget ligg ca 500 meter i frå Spissøy. - Då me kom under brua såg med at dei fiska heilt inntil anlegget. Me sette ein lettbåt på sjøen. Då fekk dei det travelt og bakka bort frå anlegget, seier Roger Hoel som er skipssjef på KV Tor til Sunnhordland. Han fortel at dei var på ein navigasjonsøvelse då dei kom over fiskarane.

- Me har tidlegare fått melding frå oppdrettsanlegg lenger sør på Bømlo som har vore plaga av fiskarar som går innafor sikkerheitssonen, seier Hoel. Han presiserar at dei fire fiska tett inntil og ikkje oppi sjølve anlegget.

Fryktar rømmingar

Det er ikkje lovleg å fiska nærmare enn 100 meter i frå eit oppdrettsanlegg, og ikkje lov å ferdast nærmare enn 20 meter. - Me frykar at fiskeredskap skal setta seg fast i nota og gjera skade slik at ein får rømming av laks, seier Hoel Tre av fiskarane er fastbuande polakkar. Ein var på besøk frå Polen.