Konkurransetilsynet sitt pålegg om å droppa samarbeidet mellom Boreal Transport og Tide Buss om Kystbussen på strekninga mellom Stavanger og Bergen, er oppheva.

Anka
Avgjersla frå Fornyings- og administrasjonsdepartementet blei kjent måndag morgon. Saka har versert i fleire år etter at Konkurransetilsynet i 2007 påla Boreal Transport Sør (tidlegare Veolia) og Tide Buss å avslutta samarbeidet med tilvising til konkurranseloven sin paragraf 10.
Konkurransetilsynet meinte at samarbeidet om Kystbussen kunne ha som formål å avgrensa konkurransen på strekninga, og at gevinsten dermed ikkje kom passasjerane til gode. Dei samarbeidande selskapa var usamde i det og anka avgjersla.

Ikkje gyldig
– Kystbussen har køyrd i heile perioden sidan Konkurransetilsynet sitt pålegg, fordi vedtaket ikkje kunne sjåast på som gyldig før departementet hadde sagt sitt. Ekspressbussrutene mellom Stavanger og Bergen er svært populær og den ruta i Noreg som transporterer flest passasjerar, skriv konsernleiar Kjetil Førsvoll i Boreal Transport Norge AS og adm. direktør Roger Harkestad i Tide Buss AS i ei pressemelding.

I 19 år
Kystbussen starta opp i 1993 og konkurrerer i dag med buss, snøggbåt og to ulike flyselskap på strekninga. Departementet gir selskapa medhald i at privatbil er ein konkurrent, og at det er gevinstar ved at dei to selskapa samarbeidar.
– Det gjelder både i utnyttinga av personell og materiell, og ikkje minst ved at ein unngår tomkøyring, skriv dei to leiarane.

– Er letta
– Både Boreal Transport og Tide Buss uttrykkjer at selskapa er letta over at departementet endeleg har teke en avgjersle, og at denne går i selskapa sin favør. Det har teke lang tid å greie ut saka, og selskapa har brukt mykje tid og ressursar på å belysa denne, står det i pressemeldinga.