Beredskapslager: Funksjonsleiar Roger Lind (t.v.) og seksjonsleiar Geir Charles Grindheim i Helse Fonna har hatt travle månader etter at koronapandemien slo inn. Foto: Magne Kydland/Helse Fonna

Helse Fonna var nesten tomme for smittevernutstyr - no er lageret fylt opp

Då koronapandemien braut ut var det ikkje mykje om å gjera før Helse Fonna gjekk tomme for smittevernutstyr. Men no er dei førebudd dersom ei ny bølgje skulle bryta ut.

– Her er meir enn nok. Me byrjar å få dårleg plass, seier seksjonsleiar Geir Charles Grindheim i Helse Fonna i ei pressemelding.

Beredskapslageret på 500 kvadratmeter inneheld munnbind, hanskar, frakkar, visir og Antibac.

Les også
Testar stadig fleire for korona

Sju millionar kroner

– Verdien på utstyret anslår eg til rundt sju millionar kroner, seier Grindheim, og legg til at det er med utgangspunkt i avtaleprisar.

Grindheim fortel at det i starten var kritisk når det gjaldt enkelte artiklar.

– Då var det jobbing 24/7 for å sikra at me fekk nok utstyr. Då måtte eg bruka heile nettverket mitt, og vel så det, seier seksjonsleiaren.

– Hadde me fått italienske eller spanske tilstandar her i Norge, ville me hatt for lite smittevernutstyr. Marginane var små, fortel Leif Terje Alvestad, direktør for internservice i Helse Fonna.

Fylte lageret: Helse Fonna har jobba lenge med å få nok smittevernutstyr på plass. Frå venstre direktør for internservice i Helse Fonna, Leif Terje Alvestad, seksjonsleiar Geir Charles Grindheim og funksjonsleiar Roger Lind. Foto: Magne Kydland/Helse Fonna

– Ekstrem mangel

I pressemeldinga skriv Helse Fonna at mangelen på smittevernutstyr var ekstrem tidlegare i år. Innkjøpsprisen på eitt enkelt visir for Helse Fonna er 14,50 kroner. I den mest hektiske fasen fekk Grindheim & Co «tilbod» om visir til 276 kroner per stykk. Det var på ei tid der heile verda hadde mangel på det same utstyret, opplyser Magne Kydland, kommunikasjonssjef i Helse Fonna.

No kjem det inn 30-40 pallar per veke frå nasjonalt beredskapslager på Gardermoen.

– Snart har ikkje Helse Fonna kapasitet til å ta imot meir, opplyser Kydland, og legg til at Helse Vest snart kan lagra utstyret i Bergen på grunn av ein avtale Helse Vest held på å inngå.

Les også
Kan bli skjebnesvangre månadar