Her får Tjerand (4) medalje
Fredag ettermiddag arrangerte Sagvåg Maritime FUS barnehage «Banevegenløpet» i samband med feiringa av barnehagedagen. Tjerand Lunde (4) var ein av deltakarane.
Ordførar i Stord kommune, Sigbjørn Framnes (Frp), har fått ei barnesaks til å opna bana med. På første forsøket skjedde ingenting.
– Dette frykta eg, seier Framnes og ler, før han endeleg får klipt bandet.
Ein av dei tilsette har kledd seg ut for anledninga.
– Ein merkar at dette er gøy for barna, men òg for oss vaksne, seier Mariann Steinsland, dagleg leiar i Sagvåg Maritime FUS barnehage.
Trass i det våte vêret ser det ut til at barna kosar seg.
Tema for årets barnehagedag er «staden vår».
– Me trekkjer mykje ned hit, så dette er staden vår, seier Steinsland.
Frå ein høgtalar kan ein høyra «Badebussen» av Kjartan Lauritzen.
Før ungane skal springa frå Fletaneset til Nysæterneset må dei varma opp.
– Det handlar om samhald og å gjera noko i lag. Me heiar ikkje på enkeltbarn, me heiar på alle, seier Steinsland.
Ungane spring bortover vegen. Heldigvis har dei regnklede på.
– Det er fint å få til ein skikkeleg «happening», seier Steinsland.
Foreldre har samla seg langs vegen med flagg for å heia.
Framme ved mål får Tiril Brattabø Saue (4) medalje saman med alle dei andre barna. Så er det tid for å henta seg kake.
– Me tenkjer at dette skal bli ein årleg happening. Me har allereie byrja planlegginga, seier Steinsland.