– Det at me stiller klokka ein time fram betyr lysare ettermiddagar og at det er vår i lufta, seier næringsminister Jan Christian Vestre i ei pressemelding.
Som ansvarleg for Justervesenet er det næringsministeren som bestemmer kva som er riktig tid her i landet.
Ved å stilla klokka ein time fram «mistar» me timen mellom klokka 02.00 og 03.00. Denne timen vil me «få» tilbake til hausten når klokka skal stillast tilbake til normaltid.
Mange lurer på kor lenge me skal halda fram med vintertid og sommartid. I EU har det vore ein diskusjon om landa skal slutta å stilla klokka. Saka er framleis under behandling.
– Me kjem til å venta på avgjersla til EU før me tar stilling til om me skal slutta å stilla klokka. Det er fleire omsyn ein må ta, som til dømes i næringslivet vil det vera ein fordel å ha same løysing som nabolanda våre, seier næringsministeren.
(©NPK)