Desse skoa vel stordabuen i snøen
Meteorologisk institutt sende onsdag ut farevarsel på gult nivå, om mogelegheit for svært mykje snø.
– Det er venta snøbyer torsdag og fredag, lokalt vil det komma 10-25 cm snø i løpet av 24 timar, står det på yr.no.
Olai Mehammer (4) og mor Irmelin Ersland (33) er på veg til tannlegen.
– Han har fått på skinnsko med saueull i botn, seier Ersland.
Fireåringen nikkar beskjedent då han får spørsmål om han er varm på beina.
– Eg valde det som passa med antrekket, seier Renata Basle (18).
Ho fortel at det kan bli litt glatt.
– Er snøen djup nok blir eg nok våt. Men eg har masse ull under, seier ho.
Håkon Eide Fagertun (18) har gått for joggesko og ullsokkar.
– Strikkesokkar er kjekt å ha, seier han.
– Eg må passa på lårhalsane i mi alder, seier Kari Lodden (74).
Ho har valt skolettar og broddar i snøvêret.
– Eg er så gammal at eg kler meg etter vêret. Ungdommane går jo rundt med hol på buksa.
Frå v. er kompisane Åsmund Leonard Sætre (16), Matheo Lohela Havn (16), Oliver Huse (16) og Peter Bergesen Vatle (16) på veg inn på skulen.
– Eg tok berre dei skoa som ikkje var våte, seier Sætre.
Dei har alle tennissokkar på og seier at dei ikkje blir kalde.
– Ein må tråkka der andre folk har tråkka før, så blir ein ikkje våt, seier Huse.
Ein ting er dei alle einige om: Det viktigaste er at skoa passar til antrekket.
Emilie Ånderå (16), Sara Lidal Pedersen (17) og Vilde Hope (17) er også blant dei som har valt joggesko i kulden.
– Eg har nokre boots, men dei blir litt mykje å gå med på skulen, seier Pedersen.