Asbjørn (7) lærte triksing av verdsmeister
Laurdag var det avspark i Solid Kiwi Bama Cup på Nysæter.
På Nysæter idrettspark er det mykje folk. Ein del av dei har samla seg i ein stor sirkel, medan andre spelar fotball.
I midten av sirkelen sit Adrian Krog (28) frå Oslo og triksar med ball.
Krog er verdsmeister i fotballtriksing og har komme til Stord i anledning cupen som IL Solid arrangerer, for å visa kva han kan.
Asbjørn Isdahl (7) frå Fitjar får opplæring av Krog til å balansera ballen mellom skulderblada.
7-åringen synest det er gøy å få læra triksing og å spela kampar.
– Triksing er kult og eg likar godt å spela fotball, seier Isdahl.
Grethe Fadnes i IL Solid fotball synest det er heilt fantastisk å sjå alle dei som har møtt opp på cupen.
– Me har fått rykte på oss for å vera ein kjekk cup, seier Fadnes.
– Det er viktig at ungane som kjem skal ha ei god og trygg oppleving.
På ein bane spelar Fana IL mot IL Trott. Her er Leona Amore Kvamme Haugvik (7) i duell med Hedda Krohn Knudsen (8).
– Det gjekk veldig fint, seier Kvamme Haugvik.
Kampen enda 2-2.
– Det var veldig gøy, seier målscorar Bjørnar Sortland Servan (8) frå Bremnes IL.
Han og laget har akkurat vunne 3-0 over motstandar Victor Korttila Haugen (8) og resten av IL Trio frå Husnes.
Det er 185 lag med på cupen, som går føre seg laurdag og søndag denne helga.
– Dei kjem hovudsakeleg frå Sunnhordland, men og frå Kopervik i sør, Sotra i nord og Sauda innover i landet, opplyser Fadnes.