Ingrid (9) laga t-skjorte om til kjole
Onsdag var det redesign- og syverkstad på biblioteket.
Det flyt med nål, tråd, måleband og sakser på Stord folkebibliotek.
14 sy-interesserte barn og ungdommar har møtt opp for å prøva seg med symaskinen.
Arrangementet er i samband med Berekraftvekene på Stord, og er sett i stand av Stord Husflidlag, Miljøagentane på Stord og Naturvernforbundet.
Ingrid Moss Bjelland (9) har tatt med seg pappa si gamle t-skjorte til syverkstaden.
Mormor Turid Moss (67) hjelper til.
– Eg synest det er kjekt å vera med, seier Moss.
Det er første gong Bjelland er på syverkstaden, men ho er godt i gang med å klippa til kjolen ho skal laga.
– Eg likar å laga ting, seier ho.
9-åringen har god dreis på syinga. Det er kanskje ikkje så rart sidan ho og søstera fekk symaskin til jul.
– Eg har sydd topp og kjole, og eg sydde nettopp ei bukse saman med mormor, seier Bjelland.
Vilja Heimro (11) har tatt med restestoff heimanfrå. Ho har sydd seg ei slags korg.
– Ein kan ha ting oppi. Kor mykje ting er litt avhengig av kor stor ho er, seier 11-åringen.
Heime har ho sydd mest panneband og nokre toalettmapper.
– Korleis skal eg festa knappane? spør Heimro.
– Du må finna fram nål og tråd, seier Britt Thorsen (72), som kjem til for å hjelpa.
Thorsen er pensjonist og er på syverkstaden som medhjelpar.
– Det er kjekt at me pensjonistar kan brukast til noko, seier ho og ler.
72-åringen synest det er kjekt å vera saman med barn og ungdom som syr, og har sjølv sydd lenge.
– Det er deilig mentalhygiene å setja seg ved symaskinen, seier Thorsen.
Rebekka Mjølhus (13) jobbar med to prosjekt samstundes.
– No held eg på med eit hårband.
Ved sidan av ligg det som kan sjå ut til å skulla bli ein bamse.
– Eg lagar kosebamse til søskenbarnet mitt, seier Mjølhus.
Hårbandet skal søskenbarnet òg få.
– Det er kjekt å laga ting til andre, synest eg, seier 13-åringen og trekkjer på smilebandet.